WAZIRI MKUU AKUTANA NA WATUMISHI WA OFISI YAKE

WAZIRI MKUU Majaliwa Kassim Majaliwa amewataka wafanyakazi wa Ofisi ya Waziri Mkuu watambue  jukumu walilonalo la kuwahudumia wananchi kutokana na majukumu ya ofisi hiyo ambayo yanagusa maisha ya kila siku ya Watanzania.

“Ofisi ya Waziri Mkuu ni kubwa na pana sana na inahusika na shughuli za kila siku za Watanzania. Kwa hiyo tuna kazi kubwa ya kukidhi matarajio yao,” alisema.

Ametoa kauli hiyo leo mchana (Jumatatu, Novemba 23, 2015) wakati akizungumza na wakuu wa taasisi, wakurugenzi na watumishi wa Ofisi ya Waziri Mkuu kwenye mkutano uliofanyika ofisini kwake, Magogoni, jijini Dar es Salaam. Leo ndiyo ameripoti kwa mara ya kwanza tangu alipoapishwa Ijumaa iliyopita kwenye Ikulu ya Chamwino, mkoani Dodoma.

Pamoja na kazi nyingine tunayo majukumu makubwa ambayo ni udhibiti, usimamizi na ufuatiliaji wa masuala mbalimbali humu Serikalini. Ninataraji kupata mpango kazi kutoka kwa Mkuu wa kila idara na kila taasisi zilizo chini ya Ofisi ya Waziri Mkuu. Nitakwenda pia ofisi za TAMISEMI ili kuweka vipaumbele vyetu sawa,” alisema.

Aliwataka watumishi hao wawe tayari kutekeleza kaulimbiu ya ‘Hapa Kazi Tu’ ambayo imekuwa ikisisitizwa na Rais Dkt. John Pombe Magufuli ili kuweza kumudu kasi ya utendaji kazi Serikali ambayo anaihimiza hivi sasa.

Alisema ana imani kuwa watumishi hao watampa ushirikiano kama ambavyo walikuwa wakiutoa kwa mtangulizi wake, Mhe. Mizengo Pinda ambaye amestaafu hivi karibuni.

(mwisho)

IMETOLEWA NA:

OFISI YA WAZIRI MKUU,

2 MTAA WA MAGOGONI,

HOTUBA YA MHESHIMIWA MAJALIWA KASSIM MAJALIWA (MB), WAZIRI MKUU WA JAMHURI YA MUUNGANO WA TANZANIA, WAKATI WA KUTOA HOJA YA KUAHIRISHA MKUTANO WA KWANZA WA BUNGE LA KUMI NA MOJA, DODOMA TAREHE 20 NOVEMBA, 2015

1.      Mheshimiwa Spika, awali ya yote napenda kumshukuru Mwenyezi Mungu
kwa kutupa afya njema na kutuwezesha kutekeleza majukumu yetu vizuri
ya Mkutano wa Kwanza wa Bunge la Kumi na Moja ulioanza tarehe 17
Novemba, 2015. Nimefarijika kuwa kazi zote zilizopangwa katika ratiba
yetu tumezikamilisha kwa muda mfupi na kwa umahiri mkubwa.

2.      Mheshimiwa Spika, naomba nitumie fursa hii ya awali kukupongeza
wewe binafsi, Kwanza kwa kuchaguliwa na Wananchi wa Jimbo la Kongwa
kuwa Mbunge wao na Pili, kwa kuchaguliwa kwa kura nyingi za kishindo
kuwa Spika wa Bunge la Kumi na Moja (11) la Jamhuri ya Muungano wa
Tanzania. Nina imani utaliongoza Bunge hili Tukufu na kukidhi kiu ya
Watanzania ya kutaka Bunge hili litekeleze majukumu yake vizuri kwa
weledi na umakini mkubwa wa kuwawezesha kupata maendeleo endelevu.

3.      Mheshimiwa Spika, katika hotuba ya ngu hii fupi napenda kutumia
nafasi hii kumshukuru tena Mheshimiwa Dkt. John Pombe Joseph Magufuli,
Rais wa Jamhuri ya Muungano wa Tanzania, kwa imani kubwa aliyoionesha
kwangu kwa kuniteua kuwa Waziri Mkuu wa Jamhuri ya Muungano wa
Tanzania. Namwombea Mungu akubariki na kukujalia afya njema na nguvu
ya kuwatumikia Watanzania. Nami nakuahidi kuoa ushirikiano na
kutekeleza yale yote uliyonielekeza. Aidha, naomba niwashukuru tena
Waheshimiwa Wabunge kwa kunithibitisha kuwa Waziri Mkuu wa Kumi na
Moja wa Jamhuri ya Muungano wa Tanzania kwa kura nyingi hapa Bungeni
kwa zaidi ya asilimia 73. Hii inaonyesha imani kubwa mliyonayo juu
yangu nami ninawaahidi kwamba nina imani kubwa juu yenu.

4.      Vilevile, nawashukuru wananchi wote wa Jimbo la Ruangwa kwa kuwa na
imani nami na kunichagua kuwa mwakilishi wao. Napenda kukishukuru
Chama changu Chama Cha Mapinduzi kwa kuniteua kugombea Ubunge katika
Jimbo la Ruangwa na kushiriki katika Kampeni zilizoniwezesha kushinda
na kuwa Mbunge wa Jimbo. Bila Wananchi wa Ruangwa na Chama changu
nisingekuwa na sifa ya kuwa Waziri Mkuu leo.

5.      Ninawashukuru Wazazi wangu kwa malezi na miongozo mbalimbali
waliyonipa ambayo imeniwezesha kufikia hatua hii leo. Ninamshukuru
Mwenza wangu kwa ushirikiano, ushauri na uvumilivu wake kwa muda wote
ambao nilikuwa nafanya kazi za utumishi wa umma. Bila yeye, naamini
nisingekuwa hata na hamu ya kushiriki siasa.

6.      Mheshimiwa Spika, nimeendelea kupokea salam za pongezi  kutoka  kwa
 marafiki,  ndugu  na Watanzania wengine. Nawashukuru sana!! Ninajua
kazi iliyo mbele yangu ni  nzito na  yenye  majukumu  mazito,  lakini
kutokana na imani kubwa ushirikiano mliyonionesha na kwa msaada wa
Mungu naamini nitaiweza. Ninachowaomba wote ni ushirikiano wenu. Nami
ninaahidi nitafanya kazi kwa bidii, maarifa na uadilifu kuwatumikia
Watanzania wote na sitowaangusha. Awamu ya Tano ya Uongozi wa Nchi
yetu ni ya Kazi tu. Mheshimiwa Rais ameshaonesha mwelekeo. Nami
nitaitekeleza Kaulimbiu hiyo kwa nguvu zangu zote. Nampongeza sana
Mheshimiwa Rais!

7.      Mheshimiwa Spika, hivi punde Mheshimiwa Rais ameeleza kwa kina
kuhusu wajibu wetu katika kujenga Nchi yetu. Nimpongeze sana
Mheshimiwa Rais kwa hotuba yake nzuri ambayo ndiyo mwongozo wetu
katika kuanza kutekeleza majukumu yetu. Kama Kiongozi wa Shughuli za
Serikali Bungeni, naomba niseme machache kwa yale aliyoyasema
Mheshimiwa Rais na wajibu wetu kama Wabunge.

8.      Mheshimiwa Spika, Bunge la Jamhuri ya Muungano wa Tanzania lina
jukumu moja kubwa la kutunga Sheria. Sisi kama Wabunge, hiyo itakuwa
ndiyo kazi yetu ya msingi. Lakini ni kazi inayotakiwa kufanywa kwa
weledi na umakini mkubwa. Nakumbuka Rais Mstaafu, Mzee Benjamin
William Mkapa wakati akifungua Bunge Jipya la Jamhuri ya Muungano wa
Tanzania siku kama ya leo tarehe 20 Novemba, 2000 alitupa Methali ya
Kilatini inayosema:

“Mabaya wayafanyayo watu huendelea baada ya wao kuondoka Duniani.
Wanaua baada ya wao wenyewe kufa kwa hisia ya hoja walizozijenga
wakiwa hai, na kwa sheria walizozitunga.” mwisho wa kunukuu.

9.      Tunapoanza kazi hii muhimu, naomba Waheshimiwa Wabunge tukumbuke
maneno ya methali hii katika kutekeleza majukumu yetu hasa hili la
kutunga Sheria. Nami nawaombea kila la kheri na fanaka tuwe na busara
na hekima katika kutekeleza jukumu hili muhimu la utungaji sheria.

10.     Mheshimiwa Spika, kazi nyingine kubwa ya Wabunge kwa maoni yangu
ni kuwa karibu na Wananchi waliowachagua. Kuna ukweli kwamba, kama
Mbunge anafanya kazi yake vizuri, ataweza kuwa karibu na wananchi
waliomchagua kwa kuwaunganisha na Serikali na kufikisha mawazo yao
Serikalini. Aidha, Mbunge mzuri ni yule anayeweza kuwaeleza Wananchi
kile ambacho Serikali imepanga kukifanya na jinsi ya kutumia
rasilimali, fursa, mipango na taratibu zilizopo za Serikali kuboresha
maisha yao. Ninakumbuka maneno ya Rais mstaafu wa Awamu ya Nne Dkt.
Jakaya Mrisho Kikwete alipokuwa akifungua rasmi Bunge la Kumi la
Jamhuri ya Muungano wa Tanzania hapa Dodoma tarehe 30 Desemba, 2005,
alisema na nanukuu:-

“Ninyi Waheshimiwa Wabunge, ndio macho na masikio ya Wananchi.
Mmeaminiwa na kuheshimiwa. Naomba kila siku mnapoingia au kutoka
katika Bunge hili, mnapozungumza humu ndani au mnaposikiliza wengine
wakizungumza, mnapokuwa macho au mnapofumba macho kutafakari kwa kina,
kila mara mkumbuke imani na heshima hiyo kubwa mliyopewa na Wananchi.”
mwisho wa kunukuu.

11.     Maneno haya ya hekima ukiyasoma kwa undani yamebeba hoja na ujumbe
mzito sana kwetu. Ni hoja ambayo tunatakiwa tujikumbushe kila mara
katika kipindi chote cha miaka mitano cha uhai wa Bunge letu.

12.     Mheshimiwa Spika, nafahamu kuwa Mheshimiwa Mbunge anakuwa na
majukumu mengi, lakini kubwa ninalolijua ni utumishi wako kwa
waliokupa kura. Wananchi wana mategemeo makubwa kuwa kila mmoja wetu
atajitahidi kuwa nao ili ashiriki kutatua changamoto mbalimbali za
maendeleo. Mheshimiwa Rais, kwenye hotuba yake ameliezea vizuri jambo
hili.

13.     Mheshimiwa Spika, Waheshimiwa Wabunge wanalo pia jukumu la
kuisimamia na kuishauri Serikali ili kuhakikisha kuwa matatizo na kero
mbalimbali  za wananchi zinatatuliwa. Aidha, kazi ya Mbunge ni
kuisimamia Serikali kuhakikisha kuwa inatoa mchango wake kikamilifu
katika kuboresha maisha ya wananchi kwa kutumia nguvu kazi na
rasilimali tulizonazo. Ni matarajio ya Serikali kuwa itapata taarifa
na ushauri kutoka kwa Waheshimiwa Wabunge juu ya maeneo yanayohitaji
kupewa msukumo ili kuongeza kasi ya maendeleo ya Taifa letu. Kwa
upande wake, Serikali itafanyia kazi taarifa na ushauri huo. Lengo ni
kuitoa Tanzania kutoka kwenye dimbwi la uchumi ulio nyuma na tegemezi
na kuiingiza katika mkondo wa uchumi imara, endelevu, unaokua na wa
Taifa linalojitegemea. Jukumu hilo ni letu sote Watanzania. Kila mmoja
akifanya kazi kwa kujituma, nina imani Taifa letu litasonga mbele na
maisha ya watu wetu yatabadilika. Mwanazuoni mmoja, Bwana Ralph Bunche
aliandika:

To make our way, we must have firm resolve, persistence and tenacity.
We must gear ourselves to work hard all the way. We can never let up!

14.     Mheshimiwa Spika, anachosema Mwanazuoni huyu ni kwamba, tukitaka
kusonga mbele kwa mafanikio lazima tuweke dhamira ya kweli na tukomae
nayo kwa kufanya kazi zaidi na kwa bidii zote na kwa uadilifu wote.
Mheshimiwa Rais ameshatupatia nguvu mpya ya kwamba “Hapa ni Kazi tu”.
Tuweke dhamira na pasiwe na yeyote wa kuturudisha nyuma.

15.     Mheshimiwa Spika, narudia kuwaombeni kwamba sasa uchaguzi
umekwisha, wote tuseme kwa dhamira moja kuwa “yaliyopita si ndwele
tugange yajayo”. Twendeni sasa tukashirikiane na Wananchi kufanya
kazi. Turejeshe ushirikiano na mshikamano. Tuwasaidie na kuwaongoza
Wananchi kutatua matatizo yao. Tusibaki tunatafuta mchawi kumbe mchawi
tumemuanzisha sisi wenyewe kwa tabia zetu.

16.     Mheshimiwa Spika, napenda kutumia fursa hii kuomba ushirikiano wa
Watumishi wote wa Serikali katika kutekeleza Ahadi za Mheshimiwa Rais
wa Jamhuri ya Muungano wa Tanzania na Mheshimiwa Makamu wa Rais wa
Jamhuri ya Muungano wa Tanzania wakati na baada ya Kampeni za
Uchaguzi, Ilani ya Chama Cha Mapinduzi na Dira ya Maendeleo. Tufanye
kazi kwa bidii na kuwatumikia Watanzania kwa kasi na umakini wa hali
ya juu. Kila mtendaji afanye kazi kwa sababu hatutakuwa na uvumilivu
kwa wazembe.

17.     Mheshimiwa Spika, napenda kuwashukuru wote waliotuwezesha
kukamilisha shughuli zilizopangwa kwenye Mkutano huu wa Kwanza wa
Bunge la Kumi na Moja kwa ufanisi mkubwa. Ni dhahiri tumeanza vizuri
na ninaamini tutaendelea vizuri!

18.     Mheshimiwa  Spika, baada ya kusema hayo, nawatakia safari njema na
naomba kutoa hoja kwamba Bunge lako Tukufu liahirishwe sasa hadi
Jumanne, tarehe 26 Januari, 2016, saa Tatu Asubuhi litakapokutana tena
hapa mjini Dodoma.

19.     Mheshimiwa Spika, naomba kutoa hoja.

RAIS MSTAAFU JAKAYA KIKWETE AONDO0KA IKULU

YAH: TAARIFA YA HALI YA MWENENDO WA MIFUMO YA HALI YA HEWA NA MVUA ZA MSIMU WA VULI 2015

UTANGULIZI
Taarifa hii inatoa tathmini ya mwenendo wa mifumo ya hali ya hewa na msimu wa mvua za vuli kwa maeneo yanayopata misimu miwili ya mvua kwa mwaka pamoja na mvua za msimu kwa maeneo yanayopata msimu moja wa mvua kwa mwaka katika kipindi cha Novemba- Desemba 2015.
MIFUMO YA HALI YA HEWA
Kuendelea kuongezeka kwa joto katika maeneo ya Bahari ya Pasifiki kunaonesha kuimarika kwa El-Nino katika Bahari ya Pasifiki kama ilivyoelezwa katika taarifa ya Mamlaka iliyotolewa mapema mwezi Septemba, 2015. Hata hivyo, mifumo mingine ya hali ya hewa ikiwemo mwitikio wa mfumo ya hali ya hewa katika Bahari ya Hindi imekuwa na mchango hasi kinyume na ilivyotarajiwa katika mwenendo wa mvua za Vuli nchini katika kipindi cha mwezi Oktoba, 2015 na kusababisha vipindi virefu vya upungufu wa mvua katika Mikoa ya Morogoro, Pwani na Dar es Salaam.
Hata hivyo mifumo ya hali ya hewa katika Bahari ya Hindi katika ukanda wa Afrika Mashariki na ukanda wa pwani ya Angola katika Bahari ya Atlantiki imenza na inaendelea kuimarika. Kuimarika kwa mifumo hii kunatarajiwa kusababisha kunyesha kwa mvua katika maeneo mengi kama zilivyotabiriwa katika kipindi cha mwezi Novemba-Disemba 2015. Kwa upande mwingine, mpaka sasa baadhi ya maeneo ya Mikoa ya Ukanda wa Ziwa Viktoria yameendelea kupata mvua za wastani katika kipindi cha mwezi Oktoba, 2015.
MVUA KWA MWEZI NOVEMBA HADI DISEMBA 2015
Maeneo ya Ukanda wa Ziwa Viktoria, Kanda ya Magharibi na Nyanda za juu kaskazini Mashariki yanatarajiwa kupata mvua za juu ya wastani katika kipindi cha mwezi Novemba hadi Disemba 2015, pamoja na vipindi vifupi vya mvua kubwa. Kwa ujumla mwelekeo wa mvua bado ni kama ulivyotolewa mapema tarehe 2 Septemba 2015.
Maeneo yanayopata mvua mara moja kwa mwaka Mikoa ya Dodoma, Singinda, Ruvuma, Lindi, Mtwara, Songea, Mbeya, Iringa, Njombe, Tabora, Kigoma Rukwa na Katavi mvua zinatarajiwa kuanza kati ya wiki ya pili na ya nne ya mwezi Novemba, 2015. Ambapo mvua hizo zimeanza kujiimarisha katika mikoa ya Kigoma, Tabora na Katavi na zinatarajiwa kusambaa katika maeneo mengine mwezi huu wa Novemba 2015. Hata hivyo, Wilaya za Kondoa, Kongwa na Singida Vijijini katika mikoa ya Dodoma na Singida zinatarajiwa pia kupata vipindi vya mvua mapema mwanzoni mwa mwezi Novemba, 2015.
USHAURI
Mamlaka ya Hali ya Hewa inawashauri watumiaji wa taarifa za hali ya hewa ikiwa ni pamoja na wakulima, wafugaji, Mamlaka za Wanyamapori, Mamlaka za Maji na Afya waendelee kutafuta, kupata na kufuata ushauri wa wataalamu katika sekta husika katika kutekeleza mipango inayoweza kuathiriwa na mwelekeo wa hali ya hewa iliyotabiriwa.Tahadhari zilizotolewa na Mamlaka sambamba na taarifa hii ya mrejeo ziendelee kuzingatiwa .
VYOMBO VYA HABARI
Vyombo vya habari vinashauriwa kufuatilia, kupata na kusambaza taarifa sahihi za mienendo ya hali ya hewa kutoka Mamlaka ya Hali ya Hewa Tanzania (TMA) na kutumia wataalam wa sekta husika katika kuandaa na kufikisha taarifa za masuala mtambuka ya hali ya hewa kwa jamii. Aidha, jamii nayo inashauriwa kufuatilia na kuzingatia taarifa sahihi za hali ya hewa na mirejeo yake.
Mwelekeo wa mvua uliotolewa hapa umezingatia zaidi viashiria vya mvua katika kipindi cha msimu(miezi mitatu) na hali ya mvua katika maeneo makubwa. Hivyo, viashiria vinavyochangia mwenendo wa mifumo ya mvua na mabadiliko ya muda mfupi katika maeneo madogo utazingatiwa katika uchambuzi wa utabiri wa muda wa kati na mfupi. Watumiaji wa taarifa za utabiri huu wanashauriwa pia kufuatilia tabiri za saa 24, siku 10 pamoja na wa mwezi kama zinavyotolewa na Mamlaka ya hali ya Hewa Tanzania.
Mamlaka ya hali ya hewa Tanzania Itaendelea kufuatilia mwenendo wa mifumo ya hali ya hewa na kutoa taarifa za mwelekeo wa mvua nchini.
Dkt. Ladislaus B. Chang’a
KAIMU MKURUGENZI MKUU

Rais Jakaya Mrisho Kikwete akimlaki Mhubiri  TB Joshua wa kanisa la Church of All Nations la nchini Nigeria Ikulu jijini Dar es salaam jioni hii. TB Joshua ametua jijini Dar es salaam  tayari kwa kushuhudia kuapishwa kwa Rais wa Awamu ya Tano Dkt. John Pombe Magufuli siku ya Alhamisi.

 Rais Jakaya Mrisho Kikwete akiongea na Mhubiri  TB Joshua wa kanisa la Church of All Nations la nchini Nigeria Ikulu jijini Dar es salaam jioni hii.

NABII TB JOSHUA WA NIGERIA AWASILI NCHINI

Rais Jakaya Mrisho Kikwete akimlaki Mhubiri  TB Joshua wa kanisa la Church of All Nations la nchini Nigeria Ikulu jijini Dar es salaam jioni hii. TB Joshua ametua jijini Dar es salaam  tayari kwa kushuhudia kuapishwa kwa Rais wa Awamu ya Tano Dkt. John Pombe Magufuli siku ya Alhamisi.

 Rais Jakaya Mrisho Kikwete akiongea na Mhubiri  TB Joshua wa kanisa la Church of All Nations la nchini Nigeria Ikulu jijini Dar es salaam jioni hii.

Mhubiri maarufu duniani  TB Joshua wa kanisa la Church of All Nations nchini Nigeria  ametua jijini Dar es salaam leo  tayari kwa kushuhudia kuapishwa kwa Rais wa Awamu ya Tano Dkt. John Pombe Magufuli siku ya Alhamisi.

Mara tu baada ya kutua uwanja wa Ndeghe wa Kimataifa wa Julius Nyerere, TB Joshua alikwenda Ikulu moja kwa moja kumsalimia Rais Jakaya Mrisho  Kikwete  kumsabahi na kumpongeza kwa kufanikisha uchaguzi mkuu kwa uhuru na amani, huku akiondoka madarakani akiwa mtu mwenye furaha. TB Joshua amepongeza Rais Kikwete pia kwa kupata Dkt Magufuli kama mrithi wake, akimtaja Rais huyo mpya mteule kama Rais wa Tanzania wa Baraka na Fanaka tele katika awamu hii mpya.