Rais Robert Mugabe arushia MDC vijembe

Mugabe angali kutawazwa kama mshindi wa uchaguzi mkuu kutokana na kesi ya MDC mahakamani

Rais aliyechaguliwa tena kutawala kwa muhula mwingine nchini Zimbabwe Robert Mugabe, amewaambia wapinzani wake kwenye uchaguzi uliokamilika hivi karubini kuwa ikiwa hawajapendezwa na matokeo ya uchaguzi basi 'wajinyonge'.

Mugabe aliongeza kuwa hawezi kurudi kwenye serikali ya muungano iliyoafikiwa kutokana na vurugu zilizofuata uchaguzi mkuu wa mwaka 2008.

Mugabe aliyatoa matamshi yake makali kwenye sherehe za kuadhimisha siku ya mashuja waliopigania uhuru wa Zimbabwe.
Morgan Tsvangirai, anayeongoza chama cha upinzani MDC, alisusia sherehe hizo ambapo Mugabe alitoa hotuba yake ya kwanza tangu kushinda uchaguzi mkuu uliofanyika tarehe 31 mwezi Julai.
MDC kimewasilisha malalamiko yake mahakamani kupinga matokeo ya uchaguzi mkuu hali ambayo imesababisha kucheleweshwa kuapishwa kwa Mugabe. Alishinda uchaguzi huo kwa asilimia sitini ya kuza zote. Hata hivyo majaji wengi wanasemekana kumuunga mkono Mugabe kwa hivyo huenda kesi ya MDC ikatupiliwa mbali.
Chama cha Mugabe Zanu-PF kilishinda wingi wa viti vya bunge kikipata zaidi ya thuluthi mbili ikiwa ni viti 160 ya viti kati ya 210 vya bunge zima.
Sherehe za kuadhimisha siku ya mashujaa Zimbabwe, ni sherehe za kujivunia kwa wazimbabwe wakati ambapo nchi hiyo ilijipatia uhuru wake miaka ya sabini.
Hii leo Mugabe ameitoa hotuba yake ya kwanza katika eneo la kumbukumbu la vita hivyo na ambako baadhi ya wapigania uhuru wamezikwa.
Hotuba za Mugabe zinasifika zaidi kwa siasa zake kali za kizalendo, na ambazo zaidi hulenga mkoloni wake wa zamani Uingereza na pia anatarajiwa kujipiga kifua kufuatia ushindi wake mkubwa katika uchaguzi mkuu uliopita mwezi jana.
Chama cha MDC kinasusia sherehe hizo katika kile kinachosema ilikuwa wizi mkubwa wa kura uliofanywa na chama cha Zanu-PF, kwa hivyo sherehe hii bila shaka itazongwa na siasa.
Mugabe bado hajaapishwa kwa muhula wake wa saba akitawala Zimbabwe, kwa sababu ya kesi ya MDC mahakamani kupinga matokeo ya uchaguzi huo.
MDC kilisema kina ushahidi wa kutosha kuonyesha kuwa wizi wa kura ulitokea na kwamba kulikuwa na visa vingine vilivyohujumu matokeo ya uchaguzi huo ikiwemo, rushwa , dhuluma na kuvurugwa kwa daftari la wapiga kura.

Keita ashinda uchaguzi wa urais Mali

Ibrahim Boubacar Keita ana jazi ngumu ya kukarabati nchi ya Mali

Ibrahim Boubacar Keita ameibuka mshindi wa uchaguzi mkuu nchini Mali huku mpinzani wake akikubali kushindwa katika duru ya pili ya uchaguzi wa urais.

Soumaila Cisse,amekubali kushindwa na mpinzani wake,aliyekuwa waziri mkuu Ibrahim Boubakar Keita.

Bwana Cisse aliyewahi kuhudumu kama waziri wa fedha amempongeza Keita kwa ushindi huo na kumtakia kila la kheri.
Bwana Keita, mwenye umri wa miaka 68, alihudumu kama waziri mkuu kutoka mwaka 1994 hadi 2000.
Mali imekumbwa na vurugu kwa kipindi cha mwaka mmoja ikiwemo mapinduzi ya kijeshi na kufuatiwa na harakati za jeshi la Ufaransa kuwaondoa wapiganaji waliokuwa wameteka eneo la Kaskazini mwa nchi.
Hata hivyo hakuna matokeo rasmi yametolewa kufuatia duru ya pili ya uchaguzi iliyofanyika Jumapili.
Katika duru ya kwanza bwana Cisse alipata 19% dhidi ya bwana Keita aliyepata 40%
Bwana Keita anayejulikana kama (IBK) - atakuwa na jukumu la kusimamia zaidi ya dola bilioni 4 za msaada wa kigeni kwa taifa hilo ambalo uliahidiwa kwa ukarabati wa nchi.
Umoja wa mataifa umeanza kupeleka kikosi cha wanajeshi 12,600 kitakachokuwa na jukumu la kudhibiti hali nchini Mali, huku wanajeshi wa Ufaransa wakianza kuondoka.
Baada ya duru ya kwanza ya uchaguzi Bwana Cisse alikuwa amelalamika kuwepo visa vya rushwa au ununuzi wa kura huku kura zaidi ya laki nne zikisemekana kuharibika.
Hata hivyo, mahakama ya kikatiba ya Mali ilikataa madai hayo huku kiongozi wa waangalizi wa Ulaya Louis Michel, akisifu uchaguzi huo kwa ulivyoandeshwa kwa njia ya uwazi.
Mnamo Jumatatu, waangalizi kutoka Muungano wa ulaya na muungano wa Afrika, walisifu ambavyo duru ya pili ya uchaguzi ilivyoendeshwa.
'Raia wa Mali wanapaswa kupongezwa kwa sababu kulingana na mimi ninavyoona, wanatii demokrasia,'' alisema Michel.
Kabla ya uchaguzi huo Bwana keita aliahidi kuleta maridhiano nchini humo iwapo angechaguliwa.
Makubaliano yaliyoafikiwa ili kuruhusu uchaguzi kuendelea katika eneo hilo la kazkazini yanashinikiza serikali iliyochaguliwa kuanzisha mazungumzo ya amani na waasi wa kundi la Tuareg katika kipindi cha miezi miwili.

Wafuasi wa Morsi tayari kwa maandamano

Wafuasi wa Morsi tayari kwa maandamano mapya Misri

Wafuasi wa rais aliyeondolewa mamlakani nchini Misri, Mohammed Morsi, wameanza kukusanyika mjini Cairo kutaka arejeshwe mamlakani.

Maelfu walikiuka onyo la maafisa wa usalama kusitisha maandamano yao na kutoka katika kambi walizokaa nje ya msikiti wa Rabaa al-Adawiya na medani ya Nahda.

Mashirika ya kutetea haki za binadamu waliitaka serikali kujaribu kukomesha waandamanaji kuendelea kupiga kambi ili kuzuia vurugu na ghasia zengine.
Mamia ya wafuasi wa Morsi wameuawa kwenye makabiliano tangu aondolewe mamlakani na jeshi tarehe 3 mwezi Julai.
Zaidi ya watu 80 waliuawa kwa kupigwa risasi katika tukio moja karibu na msikiti wa Rabaa al-Adawiya wiki jana.
Mnamo siku ya Jumatano, serikali ilielezea hofu na wasiwasi ya kuzuka tena ghasia wakati ilipowaonya waandamanaji na kuwataka kusitisha harakati zao la sivyo serikali itumie nguvu kukabiliana nao.
Ilisema kuwa inasababisha hofu na tisho kubwa kwa usalama wa Misri.

Mambo ya kuzingatiwa na Kamati za Bunge katika kusimamia fedha na Rasilimali za Umma

Zitto Kabwe
Utangulizi
Katika madaraka yote ambayo Katiba ya Jamhuri ya Muungano wa Tanzania
imetoa kwa Bunge kwa mujibu wa ibara ya 63, wajibu wa ‘kuisimamia Serikali’
ndio wajibu unaoelezea hasa kazi za Kamati za Bunge. Ni kupitia Kamati za
Bunge, za kisekta au za mahesabu, Serikali huwajibika kujieleza kinaga ubaga
kuhusu mipango yake,kuomba fedha na kuelezea matumizi ya Fedha hizo.
Mfumo wa utendaji kazi wa Kamati za Bunge ni mfumo ambao unaweza
kuimarisha uwajibikaji nchini na hivyo rasilimali za nchi kutumika vema na
kuendeleza wananchi. Mfumo dhaifu wa Kamati za Bunge huipa fursa Serikali
kufanya itakavyo na kuimarisha ufisadi kama vile matumizi matumizi mabaya ya
madaraka, wizi, udanganyifu,hongo,uzembe uvivu.
Mada hii itajikita katika maeneo ya kuzingatia ili kuwezesha Kamati za Bunge
kusimamia misingi ya Uwajibikaji na hivyo kuzuia ufisadi na kuelekeza rasilimali za
nchi kwenye maeneo ya Maendeleo ya wananchi badala ya anasa na
kutajirisha kundi dogo la viongozi.Tutaona majukumu ya Kamati katika
kusimamia Fedha za Umma na maeneo muhimu sana ya kuweka kipaumbele
katika usimamizi huo. Tutaona changamoto za Kamati na namna ya kuzitatua ili
kuwezesha Bunge kutekeleza wajibu wake inavyopasa.
UWAJIBIKAJI
Demokrasia ya kibunge ni moja ya mfumo wa kutazamana kati ya Tawi la
Utendaji (tunaita Serikali), Tawi la Uwakilishi (Bunge) na Tawi la utekelezaji wa
Sheria (mahakama). Demokrasia inajumuisha uwajibikaji katika matumizi ya
madaraka (McGee, D 2002). Uwajibikaji ni pamoja na kuweka mifumo ya
kuwezesha maamuzi kufanyika kwa namna ambayo uadilifu unazingatiwa na
kwa ufanisi. Uwajibikaji unapaswa kuhusisha matawi yote ya Serikali na jamii kwa
kupitia asasi za kiraia na vyombo vya habari.
Ibara ya 63 ya Katiba ya Jamhuri ya Muungano wa Tanzania imegawa
madaraka kwa Mhimili wa Bunge ambapo majukumu matatu makuu
yameainishwa, nayo ni Uwakilishi, Kuisimamia Serikali na Kutunga sheria. Kwa
kupitia mambo kama kuuliza maswali kwa mawaziri na maswali ya papo kwa
papo kwa Waziri Mkuu, kuwasilisha hoja binafsi,kuwasilisha miswada binafsi na
kujadili miswada ya Serikali, hoja ya kuahirisha Bunge nk, Bunge huweza
kuifanya Serikali kuwajibika kwayo. Kamati za Bunge mahesabu – Kamati ya
Hesabu za Serikali, Kamati ya Hesabu za Serikali za Mitaana Kamati ya Bajeti, ni
muundombinu muhimu sana katika kuhakikisha kuwa Serikali inajieleza na kujibu
hoja kuhusu sera zake na namna inavyotekeleza sera hizo, maombi ya fedha na
matumizi ya fedha hizo ili kufanikisha sera za Serikali.
Uwajibikaji hauna lengo tu la kukamata watu wanaovunja sheria bali unalengo
la kuweka mfumo ambapo kila mtu mwenye mamlaka anajibu kwa matendo
yake na hata pale asipotenda ikiwa alitakiwa kutenda ( answerable to actions
and inactions). Uwajibikaji unajenga tabia ya watu, na hasa watu wenye
mamlaka, kuzingatia Katiba, Sheria, kanuni na taratibu katika kufikia maamuzi
yao.
Iwapo mtu mwenye mamlaka akifanya jambo ambalo hawezi kulitetea mbele
ya umma, au analionea aibu kulielezea, ni dalili kubwa kwamba jambo hilo au
uamuzi huo unatokana na rushwa. Uwajibikaji unaweza mfumo ambao kila mtu
mwenye mamlaka atapaswa kujielezea na kutetea uamuzi wake hadharani.
Kwa mfano, Waziri anapochukua uamuzi fulani wa kisera akijua kuwa ni lazima
uamuzi ule aujibie maswali ndani ya Bunge, itamfanya Waziri huyo afanye
uamuzi mzuri na wenye maslahi kwa Taifa. Lakini kama Waziri huyo anaweza
‘kuwaona’ wabunge fulani na kuwataka wamlinde kwa uamuzi huo ni dhahiri
uamuzi huo ni wa kutilia mashaka maana jambo jema halihitaji kulindwa. Hivyo
wakati mwingine uwajibikaji huonekana kufanyika ilhali ufanisi haupo kwani
sehemu fulani ya Wabunge inakuwa imeamua kutetea jambo lolote linaloletwa
na Waziri aliyezungumza kabla na wabunge. Hii ndio hatari kubwa sana
inayokabili mabunge mengi duniani.
Wakati kila mwaka Kamati ya Bajeti inapaswa kusimamia uwajibikaji katika
mapato ya Serikali (finance bill) na mgawanyo wake (appropriation bill), Kamati
za Mahesabu zina wajibu wa kutumia sheria hizo kuhakikisha (i) makusanyo ya
fedha hizo yamekusanywa kama ilivyoombwa na kuidhinishwa na Bunge na (ii)
Matumizi ya Fedha hizo yamefanyika kama ilivyoidhinishwa na kwa kuzingatia
thamani ya fedha (value for money).
KAMATI ZA BUNGE ZA MAHESABU
Kamati za Bunge za Mahesabu ni asasi muhimu za Bunge katika kuhakikisha
Serikali inawajibika kwa wawakilishi wa wananchi. Majukumu ya kamati hizi
yameainishwa na Kanuni za Bunge, nyongeza ya nane. Kama tutakavyoona
katika kiambatanisho cha mada hii, majukumu yote yanahusisha kazi
iliyofanywa na Mdhibiti na Mkaguzi Mkuu wa Hesabu za Serikali (CAG). Nyaraka
muhimu na ya kwanza katika kazi za Kamati za kusimamia mahesabu ni Ripoti
ya Mdhibiti na Mkaguzi Mkuu wa Hesabu za Serikali. Hivyo Kamati za Bunge za
mahesabu na CAG wanapaswa kufanya kazi kwa pamoja na kwa ushirikiano
mkubwa sana. Ndio maana Bajeti ya CAG inapitishwa na Kamati ya PAC na
ikishapitishwa hakuna mamlaka ya kuhoji tena. Vile vile PAC ndio Kamati yenye
mamlaka ya kuteua Mkaguzi wa kukagua mahesabu ya Ofisi ya CAG.
Ni wajibu wa Kamati za Bunge za mahesabu kulisaidia Bunge katika kuiwajibisha
Serikali. Mara kadhaa kumekuwa na maelezo kwamba kazi ya Bunge ni
kuishauri Serikali, hapana. Katika kuisimamia Serikali ndani yake kuna kuna
ushauri hivyo ushauri haupaswi kuwekewa mkazo zaidi ya usimamizi. Warasimu
wa Serikali wanapenda neno ushauri na kuchukia neno usimamizi. Wabunge
hawapaswi kuingia katika mtego wa ‘kazi yao ni kushauri’ kwani huo ni mtego
uliotegwa na warasimu ili kupunguza nguvu ya Bunge. Kazi ya Bunge ni
kusimamia Serikali. Kamati za Bunge za mahesabu ndio zenye kubeba mzigo
huo mkubwa sana kwa niaba ya Bunge.Hivyo tutaona ni namna gani uadilifu ni
jambo la msingi sana katika wajibu huu. Vilevile ndio maana ni rahisi sana kuona
Kamati za Mahesabu zikipewa kila aina ya shutuma kutoka kwa wasimamiwa
na wakati mwingine kwa kuwatumia baadhi ya Wabunge kwa kujua au
kutokujua.
Wakati mwingine Kamati za Bunge huambiwa kuangalia ‘mahesabu tu’ basi. Ni
wajibu wa Kamati za Bunge kuangalia mahesabu ya Umma na kuona kama
matumizi ya Fedha za Umma yanafanikisha malengo yaliyotarajiwa
(performance audit). Itakuwa ni uwendawazimu kwa Kamati kuridhika kwa
kuangalia tu mizania ya Serikali au Mashirika ya Umma au Serikali za Mitaa. Kwa
mfano ni wajibu wa Kamati kuangalia kama Fedha zilizotolewa kwa ujenzi wa
Barabara zimetumika kwa kazi hiyo. Ni wajibu zaidi wa kamati kuangalia kama
gharama hiyo iliyotumika kujenga barabara husika ndio gharama halisi na sio
kwamba imezidishwa ili kunufaisha watu wachache. Ni wajibu mkubwa zaidi wa
kamati kaungalia kama barabara hiyo imejengwa kwa kiwango kinachotakiwa.
Hii inaitwa ‘value for money’.
Katika utendaji wa Kazi hizi ni muhimu na lazima, Kamati za Bunge kutumia
kwanza Taarifa ya Mdhibiti na Mkaguzi Mkuu wa Hesabu za Serikali. Hata hivyo
Kamati pia zaweza kutumia taarifa kutoka vyanzo vingine mbalimbali kama
wananchi na vyombo vya habari katika kufikia malengo ya kuchunguza. Kwa
mfano, hivi karibuni moja ya Magazeti hapa nchini (Gazeti la Jamhuri) liliandika
kuhusu matumizi mabaya ya fedha katika Mkutano wa Smart Partnership.
Kwamba takribani shilingi bilioni nane zimefanyiwa ufisadi. Mdhibiti na Mkaguzi
Mkuu wa Hesabu za Serikali amenukuliwa akisema kwamba hajapat barua
yeyote inayomwomba (CAG haagizwi, anaombwa) kufanya ukaguzi maalumu
wa mkutano ule. Kamati ya Bunge ya PAC inaweza kutumia mamlaka yake
kumwomba CAG kufanya ukaguzi maalumu na kuwasilisha matokeo yake
kwenye Kamati na hatimaye Bungeni. Iliyokuwa Kamati ya POAC ilifanya wajibu
huu vizuri sana kwenye suala la nyumba ya Gavana wa Benki Kuu na kutokana
na ukaguzi huo hoja ile ilifungwa.
Ili kutekeleza wajibu huu muhimu wa uwajibikaji, Kamati za Bunge za mahesabu
ni lazima ziwezeshwe vya kutosha kwa mafunzo ya ujuzi (skills) na maarifa
(knowledge). Bila ya kuwa na uelewa mpana wa mambo Kamati hujikuta
zikifanya maamuzi ambayo yanakuwa na madhara makubwa kwa Taifa.
Katika kutekeleza wajibu, ni muhimu na lazima wajumbe wa Kamati kujiepusha
na vitendo vya rushwa kwani vitendo hivyo huzuia usimamizi na hatimaye
kuendeleza rushwa kwa wanaosimamiwa. Uwajibikaji ni silaha dhidi ya rushwa
na hivyo wanaosimaima uwajibikaji ni lazima wawe wasafi wao binafsi kwanza
kabla ya kusafisha walio wachafu. Uadilifu ni msingi muhimu sana katika
kujenga uwajibikaji. Bila ya uadilifu hakuna uwajibikaji na vile vile kukosekana
kwa uwajibikaji humomonyoa utamaduni wa uadilifu katika jamii.
Mambo gani ya kuzingatia?
Tumeona Wajibu wa Kamati katika kusimamia uwajibikaji wa Serikali.
Kiambatanisho kimeweka kinabaga ubaga majukumu na wajibu huo. Masuala
machache yafuatayo ni ya kuzingatia sana katika utekelezaji wa wajibu huu.
Moja, Pamoja na Matumizi yote ya Serikali ambayo Kamati husimamia,kuna
matumizi ambayo inabidi kuweka msisitizo maalumu. Moja ya matumizi hayo ni
ya Deni la Taifa. Katika Ripoti ya CAG ya mwaka 2012, hoja za kuhusu Deni la
Taifa zimeendelea kutokana na kasi ya ongezeko la Deni. Kamati inapaswa
kufahamu kwamba Mzigo mkubwa wa Deni la Taifa ni katika kulipa ambapo
Fedha nyingi za umma hutumika. Kila mwaka Bajeti ya kuhudumia Deni la Taifa
huwa ni moja ya Bajeti kubwa zaidi ya Bajeti nyingine zote. Kwa mfano mwaka
2012/13, Serikali ilitenga takribani shilingi trilioni mbili kuhudumia Deni laTaifa
peke yake ilhali robo tu ya fedha hizo ilitengwa kwa ajili ya Wizara ya Afya.
Kamati zinapaswa kukagua kwa kina na kila wakati matumizi ya mikopo ili
kuhakikisha kwamba mikopo mingi inatumika kujenga uwezo wa nchi kuzalisha
rasilimali za kuhudumia mikopo hiyo kwa kukuza uchumi, kuzalisha ajira na
kuongeza kodi.
Pili, Makusanyo ya Kodi ya Serikali. Bunge hupitisha fedha kuwezesha Mamlaka
ya Mapato Tanzania kukusanya kodi. Hivi sasa ni takribani Watanzania milioni
moja tu ndio wanalipa kodi (kwa maana ya watu binafsi walio kwenye mfumo
rasmi). Hivyo tuna wigo mdogo sana wa kodi wakati tunatumia fedha nyingi
sana kukusanya kodi hiyo kidogo. Ni Wajibu wa Kamati kuona kwamba ufanisi
katika kukusanya kodi unafikiwa ikiwemo kwa kiasi kikubwa sana kuzuia mianya
ya ukwepaji wa kodi.
Kwa mujibu wa Mamlaka ya Mapato Tanzania, asilimia 15 ya makusanyo
tarajiwa huwa hayakusanywi kwenye idara ya Mapato peke yake kutokana na
ukwepaji wa Kodi. Hii ni sawa na takribani shilingi 490 bilioni kwa kutumia
makadirio ya mwaka wa fedha 2012/13. Wakati Bandari ya Dar es Salaam
inapakua makontena 600 kwa siku, kuna wakala wa upakuaji (clearingand
forwarding agents) wa idadi hiyo hiyo katika Bandari hiyo. Haiwezekani kuwe na
wastani wa kontena moja kwa kila wakala. Eneo hili linahitaji jicho pevu kutoka
kwenye Kamati za Bunge na Mdhibiti na Mkaguzi Mkuu wa Hesabu za Serikali.
Ukwepaji kodi wa makampuni ya kimataifa pia ni ajenda kubwa ambayo kila
mara kamati inapaswa kuizingatia ili kuzuia.
Kamati ya PAC tayari imepitisha pendekezo la ukaguzi wa misamaha ya kodi
na kuiweka wazi (audit of tax exemptions and transparency). Ni matarajio
kwamba kwenye ripoti ya Mdhibiti na Mkaguzi Mkuu wa Hesabu za Serikali kwa
mwaka unaoishia Juni 2013 Watanzania wataona taarfa ya ukaguzi wa
misamaha ya kodi.
Tatu, ukaguzi wa mikataba na taratibu za Manunuzi. Hili ni eneo ambalo
limekuwa chanzo kikubwa cha ubadhirifu katika nchi yetu. Ni muhimu kila mara
kamati kuzinagtia eneo hili katika kazi zake. Eneo hili linaathiri zaidi Mamlaka za
Serikali za Mitaa ambapo udokozi imekuwa kama utamaduni na hivyo
kuzorotesha utoaji wa huduma kwa wananchi. Ni muhimu Kamati kuhitaji mara
kwa mara ukaguzi maalumu kwenye manunuzi ili kujenga uwajibikaji katika
eneo hilo na kuepusha hasara kubwa kwa nchi.
Nne, hivi sasa nchi yetu imekuwa kitovu cha biashara ya dawa za kulevya.
Vijana wa kitanzania wamekuwa wakikamatwa maeneo mbalimbali duniani
wakihusishwa na biashara ya madawa ya kulevya. Moja ya njia ya kupambana
na uharamia huu ni uwajibikaji wa mamlaka zenye wajibu wa kupambana na
madawa ya kulevya. Hivyo, Kamati za Bunge zihoji katika mahesabu ya
mamlaka hizo matumizi ya fedha za umma kupambana na biashara ya
madawa ya kulevya ilhali biashara hiyo inazidi kushamiri. Iwapo tutawajibisha
Wizara ya mambo ya ndani kitengo cha kupambana na madawa ya kulevya
tutakuwa tumechangia katika vita hii. Hatuwezi kuwa tunatenga fedha kila
mwaka dhidi ya biashara hii haramu lakini bado inazidi kushamiri. Kila mwenye
wajibu awajibishwe.
Mwisho, Ukaguzi wa zoezi la ubinafsishaji. Bado sera ya ubinafshishaji
inatekelezwa na Serikali. Ni wajibu wa Mdhibiti na Mkaguzi Mkuu wa Hesabu za
Serikali kukagua zoezi la ubinafsishaji na Kamati za Bunge kusimamia uwajibikaji
katika zoezi hili. Ubinafsishaji ni uuzaji wa mali ya Umma, hivyo ni lazima upate
usimamizi kamilifu.
Hitimisho
Kamati za Bunge za Mahesabu ni asasi muhimu za demokrasia kwani husimamia
uwajibikaji. Ni vema kamati hizi kupewa uzito stahili kwa kuwa na rasilimali za
kutosha katika kufanya kazi zake na kuhakikisha taarifa zake zinapata uzito
katika utekelezaji. Kimsingi Kamati zote za Bunge ni sawa kihadhi lakini Kamati zamahesabu ndio Bunge kiuhalisia

UGONJWA WA MNYAUKO WA NDIZI UNAVYOATHRI USALAMA WA CHAKULA MKOANI KAGERA

TAARIFA KWA VYOMBO VYA HABARI

THE UNITED REPUBLIC OF TANZANIA

DIRECTORATE OF PRESIDENTIAL COMMUNICATIONS

. Japan yatangaza sera mpya kwa Tanzania

·         Sasa Tanzania kuwa nchi lengwa ya Japan

·         Japan itasaidia Tanzania kuwa kitovu cha uwekezaji katika Afrika

·         Kushiriki maboresho Reli ya Kati

·         Kusaidia kupanua na kuboresha Bandari ya Dar Es Salaam

·         Viwanda vya Japan kujengwa nchini kikiwemo cha kutengeneza pikipiki za Honda

·         Ni matokeo ya Ziara ya Rais Kikwete Japan

JAPAN imeamua kuanzisha ushirikiano mkubwa zaidi na Tanzania ambako nchi hiyo itaifanya Tanzania kuwa nchi lengwa ya Japan na kuiwezesha kuwa kitovu cha biashara na uwekezaji katika Afrika kwa nia ya kuiwezesha kuwa na uchumi ulioimarika na wenye kuzalisha ajira nyingi kwa wananchi.

Uamuzi huo wa Japan ni matunda ya mazungumzo kati ya Rais wa Jamhuri ya Muungano wa Tanzania, Mheshimiwa Jakaya Mrisho Kikwete na Waziri Mkuu wa Japan, Mheshimiwa Shinzo Abe yaliyofanyika Tokyo, Japan wakati Rais Kikwete alipotembelea nchi hiyo Juni, mwaka huu, 2013.

Uamuzi na msimamo mpya wa Japan umetangazwa rasmi leo, Jumamosi, Agosti 10, 2013 na Waziri wa Uchumi, Biashara na Viwanda wa nchi hiyo, Mheshimiwa Toshimistu Motegi alipokutana na kufanya mazungumzo na Rais Kikwete, Ikulu, Dar Es Salaam.

Kwa upande wa Tanzania, mazungumzo hayo yamehudhuriwa pia na Waziri wa Nchi Ofisi ya Waziri Mkuu anashughulika na Uwekezaji na Uwezeshaji  Mheshimiwa Mary Nagu, Waziri wa Viwanda na Biashara Mheshimiwa Dkt. Abdallah Kigoda na Waziri wa Uchukuzi Mheshimiwa Dkt. Harrison Mwakyembe.

Waziri Motegi amemwambia Rais Kikwete kuwa ametumwa na Waziri Mkuu Abe kufuatilia mazungumzo kati yao na kutangaza rasmi kuwa Japan imeiteua Tanzania kuwa nchi lengwa na kitovu cha uwekezaji wa Japan katika Afrika Mashariki na katika Afrika kwa jumla.

Waziri Motegi pia amemwambia Rais Kikwete kuwa pia amekuja Tanzania kutoa taarifa kuwa Japan iko tayari kushiriki katika kuboresha na kuifanya ya kisasa zaidi Reli ya Kati kwa kujenga njia ya kimataifa badala ya njia nyembamba ya sasa. Amesema kuwa Japan itatuma wataalam wake kuangalia jinsi gani ya kuanza kazi hiyo ya uboreshaji wa Reli hiyo.

Aidha, Mheshimiwa Motegi ametangaza kuwa Japan itashiriki katika upanuzi na uboreshaji wa Bandari ya Dar Es Salaam kwa kuifanya ya kisasa zaidi.

Waziri Motegi amesema kuwa katika azma ya Japan ya kuifanya Tanzania nchi ya mfano katika Afrika katika uwekezaji na uchumi ulioimarisha, amekuja na kundi la wafanya biashara wa Japan ambao wanaendelea kufanya mazungumzo na wafanyabiashara wa Tanzania kuona jinsi gani wanavyoweza kusaidiana katika kuwekeza katika uchumi wa Tanzania.

                        Waziri pia amesema kuwa moja ya malengo ya uamuzi huo wa Japan ni kuhakikisha kuwa bidhaa ambazo kwa sasa zinanunuliwa moja kwa moja kutoka Japan zitazalishwa hapa nchini katika viwanda ambavyo vitajengwa na makampuni ya Japan.

Kwa kuanzia amesema kuwa makampuni mawili ya Honda na Panasonic yamekubali kujenga viwanda nchini kimoja kwa ajili ya kutengeneza pikipiki za Honda hapa hapa nchini na kingine kwa ajili ya kutengeneza vifaa vya umeme.

“Huu ni mwanzo tu Mheshimiwa Rais kwa sababu kama nilivyosema kuwa tunataka Tanzania kuwa nchi mfano ya uwekezaji wa Japan  katika eneo hili la dunia na namna hiyo kwa pamoja tutakuwa tumeshirikiana katika kuongeza ajira kwa wananchi wa Tanzania,” Mheshimiwa Motegi amemwambia Rais Kikwete.

Waziri huyo pia amesema kuwa baadhi ya makampuni ya Japan yana mipango ya kuwekeza katika kilimo, na hasa kilimo cha pamba, na kuanzisha viwanda vya nguo hapa hapa nchini.

Wakati wa mazungumzo yao mjini Tokyo, Rais Kikwete alimtaka Waziri Mkuu Abe kuwekeza zaidi katika Afrika akisisitiza kuwa Japan ni moja ya mataifa makubwa duniani ambayo yamefanikiwa kupata soko kubwa katika Afrika na hasa soko la magari.

Uamuzi huo wa Japan na ziara ya Mheshimiwa Motegi inakuja wiki na miezi michache baada ya Tanzania kuwa imepokea viongozi wa mataifa mengi yakiwemo mataifa makubwa ya Marekani na China na inathibitisha ni kiasi gani siasa na sera za Tanzania zinavyokubalika duniani.

Ends 

Imetolewa na:

Kurugenzi ya Mawasiliano ya Rais,

Ikulu,

DAR ES SALAAM.

10 Agosti, 2013